आर्थिक वर्ष २०८२/८३ को दोस्रो त्रैमासिक (Q2) को विवरणले नेपाली विकास बैंकिङ्ग क्षेत्रको उत्साहजनक अवस्था देखाएको छ। बजारमा चुनौती कायमै रहे पनि, १६ विकास बैंकहरूको संयुक्त खुद नाफा गत वर्षको तुलनामा ३४.४३ प्रतिशतले बढेको छ।
गत वर्ष यही अवधिमा रु. २.५५ अर्ब नाफा कमाएका बैंकहरू यस वर्ष रु. ३.४३ अर्ब पुर्याउन सफल भएका छन्। यो तथ्यांकले विकास बैंकहरूको नाफा आर्जनमा सुधार आएको देखाए तापनि, तीनवटा साना विकास बैंकहरू भने अझै नोक्सानीमै सीमित भएका छन्।
१६ वटा विकास बैंकमध्ये १३ वटा बैंकले नाफामा सुधार गरेका छन् (जसमा दुई बैंक नोक्सानीबाट नाफामा फर्किएका छन्) भने ३ वटा बैंक अझै नोक्सानीमा छन्। यस तथ्याङ्कले आर्थिक गतिविधिमा आएको सुधार र कर्जा असुलीमा गरिएको प्रयासले विकास बैंकहरूको नाफामा सकारात्मक असर पारेको स्पष्ट देखाउँछ।
नाफा बढ्दो बजारमा मुक्तिनाथ विकास बैंकले आफ्नो अग्रता कायम राख्दै यो त्रैमासमा सबैभन्दा धेरै रु. ६७.२० करोड (०.६७ अर्ब) खुद नाफा कमाएको छ। गत आर्थिक वर्षको सोही अवधिको ५०.३१ करोड रुपैयाँको तुलनामा ३३.५७% ले वृद्धि भएको हो।
खुद नाफा ३० करोड भन्दा धेरै कमाउनेमा मुक्तिनाथ (०.६७ अर्ब), गरिमा विकास बैंक (०.६३ अर्ब), शाइन रेसुङ्गा (०.४० अर्ब), कामना सेवा (०.३९ अर्ब), ज्योति (०.३१ अर्ब) र सांग्रिला (०.३० अर्ब) रहेका छन्। प्रतिशतको आधारमा भने मितेरी डेभलपमेन्ट बैंकले १२०.२५% को छलाङ मारेको छ।
त्यसैगरि, यस त्रैमासमा एक्सेल र सप्तकोशी डेभलपमेन्ट बैंक नाफामा फर्किएका छन् तर नारायणी, सिन्धु र साल्पा विकास बैंकले भने नोक्सानी बेहोरेको विवरण प्रकाशित गरेका छन्।
| क्र.सं. | बैंक | अपरिष्कृत खुद नाफा - दोस्रो त्रैमास (रु. १,००० मा) | वृद्धि (%) | |
| पुस २०८२ | पुस २०८१ | |||
| १ | मितेरी डेभलपमेन्ट बैंक | ५७,००५ | २५,८८१ | १२०.२५% |
| २ | लुम्बिनी विकास बैंक | २८५,३७७ | १४७,६१८ | ९३.३२% |
| ३ | सांग्रिला डेभलपमेन्ट बैंक | ३०२,५९७ | १९६,५६१ | ५३.९४% |
| ४ | मुक्तिनाथ विकास बैंक | ६७२,०४० | ५०३,१२२ | ३३.५७% |
| ५ | ग्रीन डेभलपमेन्ट बैंक | ११,००२ | ८,७२९ | २६.०३% |
| ६ | ज्योति विकास बैंक | ३११,२७१ | २५०,१३२ | २४.४४% |
| ७ | कामना सेवा विकास बैंक | ३९४,५५० | ३२२,४९३ | २२.३४% |
| ८ | शाइन रेसुङ्गा डेभ. बैंक | ४०४,२८० | ३३०,८५६ | २२.१९% |
| ९ | कर्पोरेट डेभलपमेन्ट बैंक | १२,९४२ | १०,७३९ | २०.५१% |
| १० | गरिमा विकास बैंक | ६३५,१३० | ५४९,२६६ | १५.६३% |
| ११ | महालक्ष्मी विकास बैंक | ३०५,९३१ | २८७,४९९ | ६.४१% |
| १२ | एक्सेल डेभलपमेन्ट बैंक | ८८,५३६ | -९०,५३५ | - |
| १३ | सप्तकोशी डेभलपमेन्ट बैंक | २६,८२० | -२९,९१७ | - |
| १४ | सिन्धु विकास बैंक | -१५,४६८ | ४८,७०४ | - |
| १५ | साल्पा विकास बैंक | -१०,४०१ | -१,३९२ | - |
| १६ | नारायणी डेभलपमेन्ट बैंक | -४३,३४७ | -५,२१३ | - |
| कुल जम्मा | ३,४३४,२६५ | २,५५४,५४३ | ३४.४३% | |
दोस्रो त्रैमासिकको नतिजाले विकास बैंकहरू सबल बन्दै गएको र क्षेत्रीय स्तरको बैंकिङ व्यवसाय विस्तारै लयमा फर्किएको पुष्टि गरेको छ। विशेषगरी मझौला र राष्ट्रिय स्तरका विकास बैंकहरूको प्रदर्शनले लगानीकर्ता र निक्षेपकर्तामा विश्वास जगाएको छ। यद्यपि, पुँजी आधार कमजोर भएका साना संस्थाहरूको निरन्तरको नोक्सानीले भने ती संस्थाहरूको दिगोपन र मर्जरको आवश्यकतालाई पुनः औंल्याएको छ।
